КРСУда билим берүүнүн сапаты: сурамжылоонун жыйынтыгы
КРСУнун социологиялык изилдөө борбору аккредитациялоо процедураларынын алкагында билим берүүнүн сапатын баалоо боюнча сурамжылоолорду аяктады.
Гуманитардык, медициналык, экономика, юридикалык факультеттерде, ошондой эле архитектура, курулуш жана долбоорлоо факультеттеринде аккредитацияланууга тийиш болгон билим берүү программалары боюнча профессордук-окутуучулар курамынын, студенттердин жана иш берүүчүлөрдүн арасында билим берүүнүн сапатына канааттануу боюнча изилдөөлөр жүргүзүлдү. Сурамжылоого 268 мугалим, 714 студент жана үчүнчү тараптын өкүлдөрүнөн 62 иш берүүчү катышкан.
Изилдөөнүн алкагында материалдык-техникалык базанын абалы, санитардык-гигиеналык шарттар, окуу ресурстары, мугалимдер менен студенттердин өз ара аракеттенүүсү, ошондой эле бүтүрүүчүлөрдүн теориялык жана практикалык даярдыгынын деңгээли жана билим берүү программаларынын мазмуну бааланды.
Сурамжылоонун натыйжалары профессордук-окутуучулар курамынын, докторанттардын, магистранттардын жана студенттердин КРСУда окуу процессин уюштурууга жогорку деңгээлде канааттангандыгын көрсөттү. Изилдөөгө ылайык, иш берүүчүлөрдүн 98,38% университеттин бүтүрүүчүлөрүн даярдоонун сапатына канааттанышат жана аларды ишке алууга даяр.
Мындай сурамжылоолор үзгүлтүксүз негизде жүргүзүлүп, билим берүү процессинин натыйжалуулугун көзөмөлдөөгө, андан ары өнүктүрүү багыттарын аныктоого жана билим берүү программаларынын улуттук жана эл аралык сапат стандарттарына шайкеш келишин камсыздоого багытталган. Алынган маалыматтар башкаруу чечимдерин кабыл алууда, окуу пландарын жакшыртууда, инфраструктураны модернизациялоодо жана иш берүүчүлөр менен өз ара аракеттенүүнү күчөтүүдө колдонулат.
