Билим берүү багыты: Министрлер Кабинетинин, Билим берүү министрлигинин жана алдыңкы университеттердин жетекчилигинин жолугушуусу
Бүгүн Жусуп Баласагын атындагы Кыргыз улуттук университетинин базасында Кыргыз Республикасынын Министрлер Кабинетинин Төрагасынын орун басары Эдил Байсалов менен Илим, жогорку билим берүү жана инновация министри Бахтияр Орозовдун катышуусунда кеңейтилген жыйын өттү.
Бул Кыргыз Республикасынын Илим, жогорку билим берүү жана инновация министрлигинин жаңы түзүлүшү менен мындай жогорку деңгээлдеги биринчи жолугушуу. Жыйынга өлкөнүн алдыңкы университеттеринин өкүлдөрү, анын ичинде Кыргыз-Орус Славян университетинин ректору Сергей Волков катышты.
Трибунадан сөз сүйлөгөн Эдил Байсалов Сергей Волковду жакында КРСУнун ректору болуп дайындалышы менен жеке өзү куттуктап, университеттин кыргыз-орус билим берүү өнөктөштүгүн чыңдоо аянтчасы катары маанисин белгиледи.
Талкуунун негизги темалары ЖОЖдордун учурдагы ишмердүүлүгүнө, жогорку билим берүүнүн сапатын жогорулатууга, ошондой эле башкаруу системасын трансформациялоо шартында кадр саясатын ишке ашырууга тиешелүү болду. Илим жана билим берүү тармагындагы негизги багыттарды көзөмөлдөй турган жаңы министрликтин орун басарларын тааныштырууга өзгөчө көңүл бурулду.
Жолугушуу жумушчу мүнөздө болуп, мамлекет менен академиялык коомчулуктун ачык диалогу үчүн аянтча болуп калды. Катышуучулар билим берүү стандарттарын модернизациялоо, жаңы муундагы илимий-педагогикалык кадрларды даярдоо, эл аралык кызматташтыкты кеңейтүү жана жогорку билим берүүнү санариптештирүү зарылдыгын талкуулашты.
